好開心又可以去旅行，因為呢次報名時間短，所以我可以入選，另外成績唔係咁好嘅人都可以去，真係開心！跟學校去旅行除左可以享受超優惠之外，最重要係要去平時唔會去嘅地方，所以我選左內蒙古同山西，都唔去四川。如果用６千去旅行，我一定唔會揀內蒙同山西，幾大都離開中國。
Day 1:唔係一個好開頭，就係出發前一晚老闆娘生日，去學校出面嘅燒烤舖度劈酒，幫佢頂左唔少，再加上哥度食物唔乾淨，我真係未試過一晚連嘔六次！第四次開始已經係嘔胃酸，真係好恐怖。晚上去到平遙古城，第一次住客棧，即係南方嘅酒店，但古城內仍保留呢種客棧，感覺幾特別。晚上就逛左平遙古城一部分，感受到夜景嘅美麗。
Day2:早上一起身行出客棧唔覺得凍，所以著得好少衫。點知去到城門入口好大風，吹到就快死啦。成個早上行左四分之一個古城，最後行明清一條街，基本上尋晚已經行過。由於天氣太凍，不得不試一下當地最出名嘅牛肉檔，真係好味！最後行日升昌票號，中國銀行業嘅鼻祖，由於人太多，略睇下就算。
Day3:最正嘅旅程正式開始。。差唔多１２小時嘅車程，人都崩潰！由太原去到內蒙，上內蒙不停兜兜兜都未上到山頂，海拔有１千米，真係好辛苦嘅一段路！上到希拉穆仁草原，騎馬要240RMB，真係當我地係ＳＢ？都係有好多人去試，不過試後感都係：搵笨，仲要騎到周身骨痛，志在感受下啦。草原上真係好差凍，凍到我耳仔都痛，差Ｄ凍死。哥度又咩都冇，得幾個蒙古包，中間有個飯堂，最離譜嘅事又出現啦，一隻烤全羊要1800，算啦，志在感受，仲要係瘦羊，位位80唔該！好明顯呢個景點係屠宰場啦，哈！晚上落山到呼和浩特市。
Day4：早上去響沙灣沙漠，騎駱駝我就願付費啦，仲有好多野玩。中途遇到班台灣旅客，佢地一副裝備，聲稱係沙漠行左３日３夜，由南行到北，真係ＮＢ！晚上略略咁參觀大昭寺，老闆娘係隔離買左好多內蒙手信，真係有錢。返酒店途中超級恐怖，因為主要公路炒大鍋，被迫要行小路，行上一座山，真係好好好恐怖，首先山路好窄又左右搖，臨落山仲要好大霧，能見度唔夠２米，之後仲有段泥路，部車差Ｄ上唔到去，然後又有一段路要整，被迫行隔離Ｄ樹林，真係好恐怖，全車都起身睇到實一實！好在，最後都平安到酒店，成２點啦。。
Day5：歷史必考嘅雲崗石窟終於一睹風彩，一個個小洞里面都有唔同大小嘅佛像，最大哥座成座山咁高！真係好壯觀！下午嘅仲壯觀，懸空寺，座立於恒山某山腰之上，全木造，１６００年歷史，未受過落石危機影響，真係好犀利呀！可惜上山塞車，去到太陽已落山，好可惜！晚上去五台山住宿，聽到五台山有落雪老闆娘好似好開心，我都幾興奮，未睇過落雪，不過我地去到嘅時候冇落，天氣已經開始回暖。之前小册子都話五台山上嘅住宿環境好差，但睇到酒店出面又唔覺得，都裝飾到好靚。不過當你入到間房就知咩事啦，又凍又濕，好多房都有蟲，有一個仲離譜，房都未執。。客人仲怪，我地去到已經差唔多到12點，Ｄ員工好似趕收工咁，我去完老闆娘間房返到去走廊冇燈，我間房仲要係最尾，條路好長。於是大叫同房個名，有個同學好好心出黎問我咩事，點知隔離有間房個東北大漢一開門好嬲咁同我講「這麼晚你亂叫甚麼」。我地都嚇走啦。。行到一半走廊又突然開燈，東北大漢企係燈制隔離「這不是開關嗎！」真係怪人。之後我又出去，佢打開房門企係度，好嬲咁望住我。。我心諗「仆街啦，我地班顛西，佢一定係頂唔順我地咁嘈」不一會兒，其他房都收到投訴，最正係好多野講哥個老師係佢隔離房ＸＤ總括黎講當晚係最痛苦嘅一晚，要水冇水，，要暖氣冇暖氣，要乜冇乜，連毛巾都係黃色好似冇洗咁。一係乜都冇，否則唔該做好少少！講到上網仲搞笑，只有大堂先收到WIFI，問前台佢話唔洗密碼，之後問技術人員佢話唔洗輸入密碼，但係個WIFI明明就係有密碼。。佢話會自動幫我輸入。。有冇咁神呀，你間咁嘅酒店網絡設備都唔會好得去邊啦下化，然後佢問我咩系統,我答佢ＷＩＮ７，佢即刻話唔得，我心諗你知唔知ＷＩＮ７係咩呀，我諗你仲用緊ＸＰ
Day6：痛苦嘅一晚終於過去，好快逛完幾座廟就閃人。下午去參觀東湖醋文化園，講到醋好似仙丹咁，手造同機造價錢差十倍以上。分五年八年十年十幾年，好似紅酒咁。。
Day7：最後一天，亦都係最冇精神嘅一天，早上參觀煤炭博物館，明白到煤炭工人工作環境真係好惡劣，我地南方真係一個幸福的角落。接著是山西博物館，完全冇野睇，又眼訓，真係想屎。晚上，終於回到廣州。
相比上一次文化之旅，今次好玩好多，睇下同咩人去啦，因為今次帶團嘅老師好玩得，爆粗都冇事，哈。仲有菲律賓、緬甸、韓國、泰國嘅同學仔，真係好好玩，可惜路途太倦啦！
@!#$^-~Elmo．:+:M^_ 